Dormi fighia, dormi cori

na’ stu munnu senza cori

dormi fighia. dormi amuri

na’ stu munnu trarituri.

‘U Signuri criaturi

ni retti a terra pi’ l’amuri

ni rissi, lu gran Signuri,

di siminarici aranci e ciuri

ma poi vinni l’americanu

a siminarici  bummi a manu

Dormi fighia, dormi cori…

‘U Signuri patruni ru munnu

mi retti a terra unni sugnu

e mi rissi ‘u gran Signuri

di travaghiarici cu me’ sururi

ma poi vinni l’americanu

e si fici patruni ca scupetta ‘m manu.

Dormi fighia, dormi cori…

Comu rissi ‘u profeta anticu

“jornu verrà e vi lu ricu

chi di li spadi vommiri si farà” 

ma poi vinni l’americanu

e si fici patruni ca scupetta ‘m manu

Dormi fighia, dormi cori…

Dormi fighia ‘un ti scantari

finu a dumani avemo a cantari

pi ‘unn essiri massacrati

picchì tutti l’umini sunnu frati 

ma poi vinni l’americanu

pi mettiri armi ne’ me manu.

Dormi fighia, dormi cori…

Chiantai na vigna e si siccau

picchì di Comisu si scantau

ma ‘u guvernu rici “Niente paura!

Comprate Coka a lungo non dura” 

ma poi vinni l’americanu

e ‘u guverno si vinniu ‘u siciliano.

Dormi fighia, dormi cori…

na’ stu munnu senza cori

dormi fighia. dormi amuri

na’ stu munnu trarituri.

Castasegna, 30 giugno 1983